ခရီးသွားလုပ်ငန်းကော်မတီ (၁/၂၀၂၆) အစည်းအဝေးသို့ တင်ပြမည့်အချက်များနှင့် စပ်လျဉ်းသည့် ကြိုတင်ညှိနှိုင်းအစည်းအဝေးကို မြန်မာနိုင်ငံခရီးသွားလုပ်ငန်းအဖွဲ့ချုပ် (Myanmar Tourism Federation) မှ ၂၀၂၆ ခုနှစ်၊ ဇန်နဝါရီလ ၃၀ ရက် တွင် Virtual စနစ်ဖြင့် ကျင်းပပြုလုပ်ခဲ့သည်။ အဆိုပါအစည်းအဝေးသို့ အဖွဲ့ချုပ်ဥက္ကဋ္ဌ၊ အလုပ်အမှုဆောင်များ၊ ညီနောင်အသင်းများမှ ကိုယ်စားလှယ်များနှင့် ခရီးသွားလုပ်ငန်း ကျွမ်းကျင်ပညာရှင်များ တက်ရောက်ခဲ့ကြသည်။
မဟာဗျူဟာနှင့် လုပ်ငန်းစီမံချက်များ ချမှတ်ခြင်း
အစည်းအဝေးတွင် ရှေ့ဆက်ဆောင်ရွက်မည့် ခရီးသွားလုပ်ငန်း အခင်းအကျင်းသစ် (Strategy) နှင့် လုပ်ငန်းစီမံချက် (Action Plan) များအတွက် ကြိုတင်ပြင်ဆင်မှုများကို ဆွေးနွေးခဲ့ကြသည်။ အထူးသဖြင့် ဒေသဆိုင်ရာခရီးသွားလုပ်ငန်း စီမံခန့်ခွဲမှုအဖွဲ့ (Destination Management Organization – DMO) များ စနစ်တကျ ပေါ်ပေါက်လာစေရေးအတွက် လာမည့် မတ်လအတွင်း နေပြည်တော်၌ ကျင်းပမည့် အလုပ်ရုံဆွေးနွေးပွဲတွင် ထည့်သွင်းတင်ပြနိုင်ရေးကို အဓိကထား ညှိနှိုင်းခဲ့ကြသည်။
ဥပဒေနှင့် မူဝါဒပိုင်းဆိုင်ရာ ဟန်ချက်ညီစေခြင်း
လက်ရှိကျင့်သုံးနေသော ခရီးသွားလုပ်ငန်းဥပဒေ (Tourism Law) နှင့် ခရီးသွားလုပ်ငန်း ပင်မစီမံကိန်း (Tourism Master Plan 2026-2030) တို့အကြား ဟန်ချက်ညီစေရေးသည် ကဏ္ဍတစ်ခုလုံး ရေရှည်ဖွံ့ဖြိုးတိုးတက်မှုအတွက် မရှိမဖြစ်လိုအပ်ကြောင်း ဆွေးနွေးခဲ့ကြသည်။ ထို့ပြင် ယခင်အစည်းအဝေး ဆုံးဖြတ်ချက်များအပေါ် အကောင်အထည်ဖော်မှု အခြေအနေများနှင့် အမျိုးသားခရီးသွားလုပ်ငန်းဖွံ့ဖြိုးတိုးတက်ရေး ဗဟိုကော်မတီ၏ (၁၂) ကြိမ်မြောက် အစည်းအဝေး ဆုံးဖြတ်ချက်များအနက် အဖွဲ့ချုပ်နှင့် သက်ဆိုင်သည့် အရေးကြီးသော လုပ်ငန်းစဉ်များကို ရုံးအဖွဲ့မှူးက ရှင်းလင်းတင်ပြခဲ့သည်။
ကဏ္ဍစုံ ဖွံ့ဖြိုးတိုးတက်ရေး ဆွေးနွေးချက်များ
အထွေထွေဆွေးနွေးခြင်းကဏ္ဍတွင် တက်ရောက်လာသူများမှ အောက်ပါကိစ္စရပ်များကို အကြံပြုဆွေးနွေးခဲ့ကြသည် -
ခရီးသွားကဏ္ဍတွင် ကျွမ်းကျင်ဝန်ထမ်းများ ဆက်လက်ထိန်းသိမ်းထားနိုင်ရေး (Staff Retention) ဆိုင်ရာ အခက်အခဲများ။
နိုင်ငံတကာ ခရီးသွားပြပွဲများတွင် ပါဝင်ဆောင်ရွက်ရာ၌ ကြုံတွေ့ရသည့် စိန်ခေါ်မှုများနှင့် အလားအလာများ။
Agro-tourism နှင့် Eco-tourism လုပ်ငန်းများကို PPP (Public-Private Partnership) စနစ်ဖြင့် ဖော်ထုတ်ကာ ဒေသဖွံ့ဖြိုးရေးကို အားပေးကူညီရန်။
ASEAN စံနှုန်းများနှင့်အညီ Green/Eco Tourism ဖော်ဆောင်ရေး၊ ဆေးလိပ်ကင်းစင်ရေးနှင့် ပလတ်စတစ်သုံးစွဲမှု လျှော့ချရေး လုပ်ငန်းစဉ်များ။
MRA (Mutual Recognition Arrangement) ဆိုင်ရာ သင်တန်းများ တိုးမြှင့်ပို့ချခြင်းဖြင့် လုပ်ငန်းခွင်ကျွမ်းကျင်မှု မြှင့်တင်ရေး။
အဆိုပါ ကြိုတင်ညှိနှိုင်းအစည်းအဝေးကို ညနေ (၄:၃၀) နာရီတွင် အောင်မြင်စွာ ရုပ်သိမ်းခဲ့ကြောင်း သိရှိရသည်။
